Qərb Rusiya çevrəsində münaqişələri necə qurub? - 1991-ci ildən sonraya BAXIŞ

1991-ci ildən sonra Qərb dövlətləri təkcə Ukraynada deyil, həm də Rusiyanın bütün perimetri boyu ona strateji məğlubiyyət vermək üçün işə başladılar.

Publika.az “Arquments and Facts” nəşrinə istinadən xəbər verir ki, bu barədə Rusiya Federasiya Şurasının spikeri Valentina Matvienko danışıb.

Siyasətçi bildirib ki, söhbət Mərkəzi Asiya, Qafqaz və Dnestryanıdakı münaqişələrdən gedir.

“1991-ci ildən sonra seçimin Ukraynanın üzərinə düşdüyünü düşünmək tamamilə doğru deyil. Onlar bir anda hər yeri yandırdılar, təbii ki, Ukraynada da işə başladılar”, - deyə siyasətçi bildirib.

Üstəlik, Matvienko deyib ki, Rusiya çətinliklərin öhdəsindən gəldiyi, regionlarda sülhü bərqərar etdiyi, qonşuları ilə normal münasibətlər qurduğu və MDB məkanında inteqrasiya proseslərini gücləndirdiyi bir vaxtda “Qərb öz səylərini və təxribat işlərini bizim sərhədlərimizə yönəltməyə başladı”.

Ukrayna məsələsi üzrə sülh danışıqlarından danışan Matvienko səlahiyyət müddətini başa vuran Amerika prezidenti Co Baydenin administrasiyasının danışıqları pozmaq üçün hər cür cəhd göstərəcəyinə əminliyini ifadə edib. Lakin onun fikrincə, bunun belə olacağı ehtimalı azdır.

Adəm Abbaslı