ABŞ-dan Cənubi Koreyadakı xaosa reaksiya: Alqışlayırıq

Cənubi Koreya prezidenti Yoon Suk Yeolun elan etdiyi, lakin 6 saat sonra ləğv edilən hərbi vəziyyət qərarına ABŞ hökumətindən reaksiya verilib.

Publika.az xəbər verir ki, mövzu ilə bağlı yazılı açıqlama verən ABŞ dövlət katibi Antoni Blinken Cənubi Koreyadakı prosesləri yaxından izlədiklərini bildirib.

O, Yoonun ölkə konstitusiyasına və Milli Assambleyanın qəbul etdiyi qərara uyğun olaraq hərbi vəziyyəti ləğv etmək qərarını "alqışladıqlarını" bəyan edib: "Siyasi mübahisələrin sülh yolu ilə və qanunun aliliyinə uyğun həllini gözləyirik".

Blinken Cənubi Koreya xalqına, ümumi demokratiya və qanunun aliliyinə əsaslanan ABŞ-Cənubi Koreya müttəfiqliyinə davamlı dəstəyini vurğulayıb.

Qeyd edək ki, Cənubi Koreya prezidenti Yoon Suk Yeol müxalifətin dövlət əleyhinə fəaliyyətlə məşğul olduğunu iddia edərək, hərbi vəziyyət elan etdiyini açıqlayıb. Lakin Milli Məclisdə hərbi vəziyyətin ləğvi barədə qərar qəbul edilib.

Hərbi vəziyyət təxminən 6 saat sonra başa çatsa da, hadisələr ölkədə siyasi böhrana səbəb olub. Belə ki, müxalifət partiyaları Yoonu istefaya çağırıb.

Roza