Əfqanıstan-Pakistan sərhədində TOQQUŞMA - Qırıcılar havaya qaldırıldı (YENİLƏNDİ)

Pakistan Əfqanıstanla sərhədində Taliban yaraqlılarının hücumunu dəf etmək üçün təyyarə və pilotsuz uçuş aparatlarını havaya qaldırıb.

Publika.az xəbər verir ki, bu barədə "Dawn" qəzeti təhlükəsizlik mənbələrinə istinadən məlumat yayıb.

Qeyd olunub ki, silahlı toqquşmalar Anqor-Adda, Badjaur, Kurram, Dir, Çitral (Xeyber Paxtunxva əyaləti) və Baram-Çah (Bəlucistan əyaləti) şəhərlərində baş verib.

Təhlükəsizlik mənbələri Əfqanıstan qüvvələrinin böyük itki verdiyini bildiriblər.

Bundan başqa, artilleriya, tanklar, yüngül və ağır silahlar, təyyarələr və pilotsuz uçuş aparatlarından istifadə etməklə Əfqanıstandakı yaraqlıların bazalarına zərbələr endirilir.

"İŞİD terrorçularının Əfqanıstanda Pakistan-Əfqanıstan sərhədi yaxınlığında yerləşən düşərgələrinə və sığınacaqlarına zərbələr endirilir və Taliban bir neçə bölgədən geri çəkilib", - Pakistan Dövlət Radiosu xəbər verib.

xxx

2:12

Əfqanıstan-Pakistan sərhədində, bütün Dürand xətti boyunca şiddətli döyüşlər baş verib.

Publika.az xəbər verir ki, bu barədə "Tolo News" xəbər portalı məlumat yayıb.

Yerli mənbələrin bildirdiyinə görə, “Taliban” hərəkatı ilə Pakistan ordusu arasında Dürand xətti boyunca genişmiqyaslı toqquşmalar yaşanır. Qeyd edək ki, bu sərhəd xətti Kabil tərəfindən rəsmi olaraq tanınmır.

Dəqiqləşdirilmiş məlumatlara əsasən, bu qarşıdurmalarda Pakistan tərəfi beş hərbçisini itirib.

Ən gərgin döyüşlər Kunar, Nangarhar və Həlmənd vilayətlərində baş verib. “Taliban” qüvvələri Pakistanın sərhəd postlarına müxtəlif istiqamətlərdən hücum ediblər.

Mövcud məlumatlara görə, bəzi bölgələrdə Pakistan ordusu mövqelərini tərk edərək geri çəkilib.

“Yerli mənbələr Həlmənd vilayətinin Baxramça bölgəsində Pakistan ordusuna məxsus sərhəd postunun ələ keçirildiyini də təsdiqləyiblər”, - deyə xəbər portalı bildirir.

Bundan əlavə, Kəndəhar vilayətinin Şorabak bölgəsində də silahlı qarşıdurmalar başlayıb.

Hüseyn İbadlı