Dünya

Trampdan Ərdoğanla bağlı etiraf: Məndən ona zəng etməyimi xahiş edirlər

10 Dekabr 2025 10:48

ABŞ prezidenti Donald Tramp "Politico" qəzetinə müsahibəsində Türkiyə barədə fikirlər səsləndirib.

Publika.az xəbər verir ki, Tramp müsahibə zamanı Türkiyə Prezidenti Rəcəb Tayyib Ərdoğanı dostu olaraq təqdim edib.

O bildirib ki, NATO ölkələri Türkiyə ilə problem yaşadıqda ona zəng edirlər: "Onlar bununla bağlı çətinlik çəkirlər və məndən Ərdoğana zəng etməyimi xahiş edirlər. Zəng edirəm və həmişə onunla həll yolu tapıram".

Tramp Ərdoğanla həmişə yaxşı yola gedə bildiyini qeyd edib: "O, güclü bir ölkə və güclü bir ordu qurdu".

Amerika Prezidenti həmçinin, "NATO üçün çətin olan ölkələr var" deyərək buna Türkiyəni nümunə kimi göstərib.

Ukrayna müharibəsinin Avropa üçün böyük bir problem olduğuna diqqət çəkən Tramp Avropa liderlərinin böhranı yaxşı idarə etmədiklərini də əlavə edib: "Onlar Ukrayna haqqında danışırlar, amma heç nə etmirlər və müharibə davam edir".

Roza