Hazırlaşmaq lazımdır: Əhaliyə meqazəlzələ xəbərdarlığı edildi

Yaponiya 7,5 bal gücündə zəlzələdən sonra ölkənin şimalı üçün meqazəlzələ xəbərdarlığı edib. Səlahiyyətlilər 8 bal və daha böyük zəlzələ ehtimalının cəmi 1% olduğunu bildirsə də, insanları zəlzələlərə hazır olmağa çağırıb.

Publika.az xəbər verir ki, bu barədə "Associated Press" məlumat yayıb.

Bildirilir ki, Yaponiyanın əsas Xonsyu adasının ən şimal prefekturası olan Aomori adasının şərq sahillərində baş verən 7,5 bal gücündə zəlzələdən sonra Yaponiya güclü “meqazəlzələ” xəbərdarlığı edib. Zəlzələdən dəyən ziyan cüzi olub, 34 nəfər əsasən yüngül xəsarət alıb, bəzi yollara və binalara ziyan dəyib.

Rəsmilər verilən tövsiyələrin proqnoz olmadığını, 8 və ya daha böyük zəlzələ ehtimalının yalnız təxminən 1% olduğunu söyləyib. Bununla belə, səlahiyyətlilər ümid edir ki, bu tövsiyələr ictimaiyyətə 2011-ci ildə təxminən 20 min insanın ölümünə səbəb olan fəlakətə bənzər dağıntılara səbəb ola biləcək güclü zəlzələyə hazırlaşmağa kömək edəcək.

Səlahiyyətlilər qarşıdakı həftə ərzində 8 bal və daha böyük zəlzələ riskinin artdığını bildirib və sakinləri, xüsusən də sahilyanı ərazilərdə yaşayanları hazır olmağa çağırıb. Yaponiya Meteorologiya Agentliyi bazar ertəsi baş verən güclü zəlzələnin Xokkaydo və Sanriku sahillərində potensial riskləri müvəqqəti olaraq artırdığını bildirib. Bu, Yaponiyanın altındakı Sakit okean plitəsinin keçmişdə çoxsaylı güclü zəlzələlərə səbəb olan iki xəndək kimi strukturu - Yaponiya xəndəyi və Sisima xəndəyini əmələ gətirdiyi yerdir.

Mütəxəssislər 2011-ci ildə baş verən ölümcül zəlzələ və sunaminin Yaponiya xəndəyi ilə əlaqəli hərəkət nəticəsində baş verdiyini deyirlər. O, Tibanın şərq sahilindən Aomori adalarına qədər, Sisima xəndəyi isə Xokkaydonun şərq sahilindən Kuril adalarına (Rusiya) qədər uzanır.

Rəsmilər vurğulayırlar ki, son məsləhətdə hər hansı böyük zəlzələnin konkret vaxt və ya yerdə baş verəcəyi proqnozlaşdırılmır.

Sakinlərdən ehtiyatlı olmaq tələb edilib. Rəsmilər insanlara bir neçə günlük zəruri ləvazimatları, həmçinin çəkmələr və dəbilqələri ehtiva edən təcili yardım dəstini özləri ilə gəzdirməyi tövsiyə edib.

Adəm