Türkiyəli qadın atasının Tramp olduğunu iddia edir - FOTO

55 yaşlı Necla Özmen atasının 79 yaşlı ABŞ Prezidenti Donald Tramp olduğunu iddia edir.

Publika.az xəbər verir ki, bu barədə Türkiyənin "Hürriyet" qəzeti məlumat yayıb.

Məlumata görə, rəsmi sənədlərə əsasən türkiyəli qadının valideynləri bir neçə il əvvəl vəfat edən Satı və Dursun Özmenlərdir.

Lakin iddia edilir ki, Satının uşağı ölüb və eyni xəstəxanada doğuş edən Sofiya adlı amerikalı qadın yeni doğulmuş körpəsini Özmen ailəsinə verib.

Neclanın sözlərinə görə, "anası" Trampı televiziyada gördükdən sonra ona əslində atasının ABŞ Prezidenti olduğunu deyib.

Türk qadın Trampın həqiqətən atası olub-olmadığını bilmədiyini vurğulayıb. Buna görə də o, Ağ Evin məsul şəxsinin onunla danışmasını və əgər razılıq əldə olunarsa, DNT testi aparılmasını istəyir. Özmen Trampın yaxşı ata olduğuna və onu rədd etməyəcəyinə əminliyini bildirib.

Qeyd edək ki, oktyabr ayında Ankara məhkəməsi sübutların olmaması və iddianın qanuni tələblərə cavab verməməsi səbəbindən Neclanın iddiasını rədd edib. Lakin Necla təslim olmur və apelyasiya şikayəti verməyi planlaşdırır.

O, həmçinin ABŞ-ın Türkiyədəki səfirliyinə və Amerika məhkəmələrinə müraciət edib.

Ləman