Afrika toqquşma meydanına çevriləcək – Rusiyadan QORXULU PROQNOZ

Qlobal gərginliyin artması fonunda Afrika 2026-cı ildə əsas münaqişə zonasına çevrilə bilər.

Publika.az Rusiya mətbuatına istinadən xəbər verir ki, bunu siyasi ekspert Aleksandr Konkov deyib.

Onun sözlərinə görə, əsas münaqişə Rusiya-Ukrayna müharibəsi olaraq qalır və bura xeyli sayda dövlət cəlb olunub.

Konkov qeyd edib ki, Yaxın Şərq də ciddi risk mənbəyi olaraq qalır. Region etnik, dini və geosiyasi gərginliklərin bir-birinə qarışması, eləcə də İsrail, Türkiyə və ərəb ölkələri də daxil olmaqla xarici güclərin aktiv müdaxiləsi ilə xarakterizə olunur.

Ekspert Tayvan boğazını digər potensial təhlükəli ərazi kimi müəyyən edib və Pekinin məsələni güc yolu ilə həll etmək niyyətində olmadığını bəyan etməsinə baxmayaraq, dialoqun mahiyyətinin tərəfləri sərt ssenarilərə doğru sürüklədiyini iddia edib.

Ekspert Afrikaya xüsusi diqqət yetirib. Onun sözlərinə görə, qitə getdikcə böyük dövlətlər arasında potensial maraqların toqquşması arenasına çevrilir. Afrika Şərq-Qərb və Şimal-Cənub xətləri boyunca qlobal qarşıdurma arenası kimi qəbul edilir.

Politoloq həmçinin xatırladıb ki, Vaşinqton 2025-ci ildə dəfələrlə Qrenlandiya, Kanada və Panama ilə bağlı ambisiyalarını bəyan edib. ABŞ narkotik qaçaqmalçılığına qarşı mübarizə adı altında Latın Amerikasında siyasi təsirini artırır ki, bunun da münaqişələrə səbəb olacağı qaçılmazdır.

Adəm