“Qiyamət buzlağı” sürətlə əriyir - Rusiya təhlükə altındadır?

“Qiyamət buzlağı” kimi tanınan Tüeyts buzlağının əriməsinin (bu proses dəniz səviyyəsinin əhəmiyyətli dərəcədə qalxmasına səbəb ola bilər - red.) Rusiya, xüsusilə də Sankt-Peterburq üçün yaratdığı təhlükə qiymətləndirilib.

Publika.az xəbər verir ki, bunu Rusiya Federasiya Şurasının Aqrar-ərzaq siyasəti və təbiətdən istifadə komitəsinin sədr müavini Sergey Anoprienko TASS-a açıqlamasında bildirib. O, burada təhlükə olmadığını və bunun təbii proses olduğunu qeyd edib.

“Əslində söhbət buzun qopması və buzlaqların hərəkət etməsi kimi normal təbii prosesdən gedir. Buzlaqlar hərəkət edərək “yaşayır”, yəni buzun bir hissəsi müntəzəm olaraq okeana aysberq formasında düşür və axınla hərəkət edir”, - deyə o izah edib.

Anoprienko bildirib ki, aysberqlər isti enliklərə doğru hərəkət etdikdə tədricən əriyir və okeanda artıq üzən buz kütlələri su səviyyəsinə “normadan artıq” təsir göstərmir.

Senator həmçinin təbiətdə mövsümi su dövranına diqqət çəkib. Onun sözlərinə görə, əsas məsələ bu proseslərin sürətini və balansını düzgün qiymətləndirməkdir.

“Yeganə praktik çıxış yolu var, o da riskləri proqnozlaşdırmaq və adaptasiya tədbirlərini qabaqcadan hazırlamaq. Sankt-Peterburqun belə bir planı var və o, kifayət qədər güclüdür. Bu plan A. İ. Voyeykov adına Baş Geofizika Rəsədxanasında hazırlanıb. Bu, iqlim çağırışlarına panika ilə yox, hesablamalar, monitorinq və infrastrukturun hazırlığı ilə cavab verməyin nümunəsidir”, - deyə Anoprienko vurğulayıb.

Qeyd edək ki, daha əvvəl Kaliforniya Universitetinin alimləri “Qiyamət buzlağı”nın əvvəl düşünüldüyündən daha həssas olduğunu və onun daha da geri çəkilməsinin sahilyanı ərazilər üçün təhlükə yaratdığını bildirmişdilər.