Polşanın Ukraynaya “An-28” təyyarəsi göndərdiyi üzə çıxdı

Fransada yayımlanan televiziya reportajında Ukraynaya məxsus “An-28” kimi təqdim olunan təyyarənin əslində dronlarla mübarizə üçün xüsusi olaraq yenidən təchiz edilmiş Polşanın “PZL M28 Skytruck” təyyarəsi olduğu üzə çıxıb.

Publika.az xəbər verir ki, bu barədə “Military Informant” nəşri məlumat yayıb.

Söhbət adi nəqliyyat təyyarəsindən getmir. Bu hava vasitəsi 1984-cü ildən etibarən ABŞ-ın “Lockheed Martin” şirkətinin törəmə müəssisəsi olan Polşanın PZL şirkəti tərəfindən istehsal edilən Sovet mənşəli “An-28” təyyarəsinin modifikasiyasıdır. Təyyarə orijinal versiyadan Kanadanın “Pratt & Whitney” mühərrikləri, eləcə də dəyişdirilmiş füzelyaj və qanad konstruksiyası ilə fərqlənir.

Təyyarənin pəncərələrindən birində dronları məhv etmək üçün nəzərdə tutulmuş çoxlüləli pulemyot yerləşdirilib. Heyətə iki pilotla yanaşı, infraqırmızı kamera operatoru və gecəgörmə eynəyi ilə təchiz olunmuş atıcı da daxildir.

Qeyd olunur ki, Varşava və Kiyevdəki rəsmi qurumlar bu xüsusi təyyarənin Ukraynaya verilməsi ilə bağlı hələlik heç bir rəsmi açıqlama verməyiblər.

Adəm