Epşteynin ölümsüzlük planı üzə çıxdı - Tükürpədici detallar

Yeni açıqlanan məhkəmə sənədləri milyarder Ceffri Epşteynin genetik testlər və regenerativ tibb vasitəsilə cavanlaşma və ömrünü uzatma ehtimalını araşdırdığını ortaya qoyur. Sənədlər Epşteynin öz DNT-sindən istifadə edilən elmi tədqiqatlara maliyyə dəstəyi göstərdiyini təsdiqləyir.

Publika.az xəbər verir ki, yayımlanan elektron poçt yazışmalarına görə, Epşteyn regenerativ tibb sahəsində istifadə olunacaq genetik testlərin pulunu ödəyib.

Bu tədqiqatların əsas məqsədi bədənin zədələnmiş toxuma və orqanlarının bərpası, eləcə də, qocalma prosesinin ləngidilməsi imkanlarını araşdırmaq olub.

CNN-in məlumatına əsasən, Epşteyn 2008-ci ildə məhkum edilməsindən bir neçə il sonra ABŞ-nin aparıcı tibb müəssisələrindən birində çalışan həkimdən yeni genetik testlər əldə edib.

Bu tədqiqatları həyata keçirən şəxs həmin dövrdə Massaçusets Ümumi Xəstəxanasının baş həkimi olan Cozef Takuriya idi. Takuriya eyni zamanda Harvard Tibb Məktəbi ilə əlaqəli genişmiqyaslı genom tədqiqatlarında iştirak edib.

Onun CNN-ə verdiyi məlumata görə, Epşteyn könüllülərdən toplanmış genetik məlumatlar üzərində elmi araşdırmalar aparan Harvard Şəxsi Genom Layihəsinə də daxil edilib.

ABŞ Ədliyyə Nazirliyi tərəfindən yayımlanan sənədlər arasında Takuriyanın 2014-cü ilin fevralında Epşteynə göndərdiyi və özəl genom ardıcıllığı layihəsi üçün maliyyələşdirmə tələb edən təklif məktubu da yer alır. Həmin sənədlərdə Epşteynə müxtəlif genetik test variantlarının təqdim edildiyi görünür.

2014-cü ilin iyun ayında Epşteyn genomunun bir hissəsinin ardıcıllıqla müəyyənləşdirilməsi üçün 2000 dollarlıq ilkin investisiyanı əhatə edən ətraflı faktura alıb. Fakturada gen redaktə üsullarından istifadə edilərək, “fərdiləşdirilmiş uzunömürlülük tədqiqatları” aparılması planları da qeyd olunub. Sənədlərə əsasən, Epşteyn bu məqsədlə tüpürcək nümunəsi təqdim edib.

Ödənişin 1000 dolları genomun “ekzom” adlanan hissəsinin ardıcıllığının müəyyənləşdirilməsinə, digər 1000 dolları isə “gəncliyin” geri qaytarılmasına yönəlmiş tədqiqatlarda mühüm rol oynayan birləşdirici toxumalardakı hüceyrələrin araşdırılmasına ayrılıb. Epşteynin komandası həmin gün 2000 dollarlıq çek göndərib.

Takuriyanın təqdim etdiyi təkliflər arasında o dövrdə yeni sayılan CRISPR texnologiyasından istifadə etməklə Epşteynin kök hüceyrələrində uzunömürlülüklə əlaqəli mutasiyaların yaradılması variantı da yer alıb. Sənədlərdə yeni kök hüceyrələrinin hazırlanması üçün 10 min dollardan başlayan alternativlər, Epşteynin bütün genomunun ardıcıllığının çıxarılmasının isə təxminən 11 min 400 dollara başa gələcəyi göstərilib.

Təklif olunan bütün layihələrin ümumi dəyəri 193 min 400 dollar olaraq hesablanıb. Lakin Epşteynin bu qabaqcıl və bahalı tədqiqatların tam maliyyələşdirilməsini həyata keçirdiyinə dair sənədlərdə hər hansı qeyd aşkar edilməyib.

Ceffri Epşteyn 2019-cu ildə federal cinsi alver ittihamları ilə məhkəməni gözlədiyi dövrdə vəfat edib. Yayımlanan sənədlər onun gen redaktəsi və ömrü uzatma ideyalarına uzun illər ərzində xüsusi maraq göstərdiyini ortaya qoyur.

Daha əvvəl ictimaiyyətə məlum olmuşdu ki, Epşteyn artıq fəaliyyətini dayandırmış fondu vasitəsilə Dünya Transhumanistlər Assosiasiyasına (indiki Humanity+) ianələr edib və öz genlərindən istifadə edərək, yeni nəsil insan yaratmaq ideyasını müxtəlif elm adamları ilə müzakirə edib. (Qafqazinfo)