Nyu-Dehlidəki görüşdə gizli detallar: ABŞ-la Hindistanın planı bəlli oldu

Hindistan və ABŞ arasında hərbi əməkdaşlıq yeni mərhələyə qədəm qoyur. Tərəflər birgə silah istehsalı və strateji müdafiə müqavilələri ilə bağlı mühüm razılaşmalar əldə ediblər.

Publika.az xəbər verir ki, bu barədə Hindistan Müdafiə Nazirliyi ikitərəfli müdafiə siyasəti qrupunun iclasından sonra məlumat yayıb.

Nyu-Dehlidə keçirilən danışıqlara Hindistanın müdafiə naziri Racnatx Sinqx və Pentaqon rəhbərinin müavini Elbric Kolbi həmsədrlik edib. Görüş zamanı tərəflər hərbi qarşılıqlı fəaliyyətin genişləndirilməsinə hazır olduqlarını təsdiqləyərək, prioritet əməkdaşlıq istiqamətlərini müəyyənləşdiriblər.

Müzakirələrin əsas mövzularından biri Hindistan ordusuna ABŞ-ın yüksək dəqiqlikli "Excalibur" artilleriya sursatlarının tədarükü və "Javelin" tank əleyhinə raketlərinin təcili satın alınması imkanları olub. Bundan əlavə, Hindistanın dəniz sərhədlərinin qorunması məqsədilə altı ədəd "P-8I" sualtı qayıqlara qarşı mübarizə təyyarəsinin alınması planları xüsusi diqqət mərkəzində saxlanılıb.

Qeyd edək ki, rəsmi Vaşinqton bundan əvvəl də Hind-Sakit okean regionunda təhlükəsizliyin təmin edilməsi üçün Hindistanla uzaqmənzilli yüksək dəqiqlikli silahlar və sualtı qayıqlara qarşı müdafiə sahəsində tərəfdaşlığı gücləndirmək niyyətini bəyan etmişdi.

Adəm