Rusiyanın hədəfi dəyişdi - Ukrayna kəşfiyyatı açıqladı

Rusiyanın Ukraynadakı enerji infrastrukturuna hücumlarından sonra, diqqətini su sistemlərinə yönəldə biləcəyi barədə xəbərdarlıqlar edilib.

Publika.az xəbər verir ki, “KyivIndependent”ə danışan ekspertlərin fikrincə, belə bir strategiya ölkə daxilində ciddi humanitar böhran və sosial gərginlik riski daşıyır.

Ukraynanın Baş Kəşfiyyat İdarəsinin (HUR) qiymətləndirməsinə görə, hava istiləşdikcə enerji tələbatının azalması və su tələbatının artması ilə Rusiyanın hücum hədəfləri də buna uyğun olaraq formalaşdırıla bilər. Enerji və su infrastrukturu kimi xidmətlərin hədəfə alınması isə beynəlxalq hüquqa görə müharibə cinayəti hesab olunur.

Rəsmilərin sözlərinə görə, yaşayış məntəqələrində su təchizatı infrastrukturuna mümkün hücumlar Rusiya tərəfindən Ukrayna xalqı arasında sosial gərginlik və etiraz meylləri yaratmaq məqsədi ilə planlaşdırılır.

Ukrayna lideri Vladimir Zelenski də bu ayın əvvəlində verdiyi açıqlamada oxşar narahatlıqlarını ifadə edərək, su infrastrukturunun Rusiyanın növbəti əsas hədəflərindən biri ola biləcəyini qeyd edib.

Xarkov Vilayətinin qubernatoru Oleq Synehubovun sözlərinə görə, aprelin 14-də Rusiya Peçeneq bəndini altı idarə olunan raketlə hədəfə alıb. Elə həmin gün Zaporojye Regional Hərbi Administrasiyasının (OVA) rəisi İvan Fyodorov Rusiya qüvvələrinin Zaporojye bölgəsinə hücum zamanı ixtisaslaşmış su təchizatı təmiri avadanlıqlarına zərər verdiyini açıqlayıb.

Ekspertlər vurğulayır ki, Rusiyanın son hücumları bu prosesin başlamış ola biləcəyini göstərir.

Müllif: Roza