Tramp köməkçilərinə gizli şəkildə bildirib: İran bunu edərsə...

ABŞ prezidenti Donald Tramp köməkçilərinə yalnız Amerika əsgərlərinin öldürüləcəyi təqdirdə İranla mövcud atəşkəsdən imtina edəcəyinə söz verib.

Publika.az xəbər verir ki, bu barədə “The Wall Street Journal” məlumat yayıb.

Qəzet ABŞ rəsmilərinə istinadən xəbər verir:

“Prezident köməkçilərinə gizli şəkildə bildirib ki, Tehran Amerika əsgərlərini öldürərsə, İranla atəşkəsə son qoymağı düşünə bilər".

Qəzet qeyd edir ki, Trampın hərbi əməliyyatları bərpa etmək istəməməsi, "Yaxın Şərqdə daha böyük bir münaqişədən qaçmaq üçün həftələrlə və hətta aylarla kiçik alovlanmalara dözməyə hazır ola biləcəyini" göstərir.

Çərşənbə axşamı Tramp münaqişənin həlli üçün İranla danışıqların gedişatından məmnun olduğunu bildirib. O, Ağ Evdə jurnalistlərə bildirib ki, "Hər şey yaxşı gedir".

Razılığa gəlmək şanslarından danışan Amerika prezidenti nə müsbət, nə də mənfi ssenarini istisna etməyib. "Bəlkə də heç nə baş verməyəcək. Yaxud bəlkə də hər şey uğurlu olacaq və ola bilsin ki, bu həftənin sonuna qədər uğur qazanmaq şansı var", - deyə o bildirib.

Trampın sözlərinə görə, İran "nəzəri olaraq saziş imzalamağa yaxındır".

Müəllif: Tural