Türkiyə nüvə enerjisinə keçmək məcburiyyətindədir - Bayraktar

Türkiyənin energetika və təbii sərvətlər naziri Alparslan Bayraktar ölkəsinin təmiz enerji keçidi çərçivəsində üç əsas hədəfə fokuslandığını açıqlayıb.

Publika.az xəbər verir ki, nazir enerji təchizatının təhlükəsizliyi, enerji müstəqilliyi və 2050-ci illərin əvvəllərinə qədər karbon neytral iqtisadiyyatın qurulmasının əsas prioritetlər olduğunu bildirib.

Bayraktar qeyd edib ki, Türkiyə istifadə etdiyi enerjinin üçdə ikisini idxal edir və bu, iqtisadiyyatda həssaslıq yaradır. Onun sözlərinə görə, enerji sahəsində xarici asılılığın aradan qaldırılması ölkə üçün strateji əhəmiyyət daşıyır.

Nazir nüvə enerjisinin bu hədəflərə çatmaq üçün vacib olduğunu vurğulayıb. "Türkiyə nüvə enerjisinə keçmək məcburiyyətindədir. Bu, emissiya yaratmadan elektrik istehsalının əsas yollarından biridir", - o qeyd edib.

Bayraktar əlavə edib ki, Türkiyə artan elektrik tələbatını qarşılamaq məqsədilə bərpa olunan enerji gücünü sürətlə artırır və enerji səmərəliliyinin yüksəldilməsi istiqamətində fəaliyyətini davam etdirir.

Müəllif: Roza