Rutte Trampı belə sakitləşdirdi - Ağ Evdə diqqətçəkən anlar

NATO-nun baş katibi Mark Rutte ABŞ prezidenti Donald Trampın alyans ölkələrinin İrana qarşı Amerika kampaniyasına dəstək verməməsindən yaranan narazılığını yumşaltmağa çalışıb.

Publika.az xəbər verir ki, bu barədə “Bloomberg” məlumat yayıb.

Məlumata görə, Oval kabinetdə keçirilən görüş zamanı Rutte Trampa xüsusi hazırlanmış təqdimat nümayiş etdirib. Qızılı şriftlə hazırlanmış və “Trampın trilyonu”, “Tramp-47 effekti” adlandırılan qrafiklərdə NATO ölkələrinin müdafiə xərclərinin Trampın 2017-ci ildə başlayan ilk prezidentlik dövrü ilə müqayisədə artdığı göstərilib.

Rutte bildirib ki, Avropa ölkələri müdafiə xərcləri məsələsində ABŞ-la paritet səviyyəsinə çatıb. Onun sözlərinə görə, belə göstərici sonuncu dəfə 1950-ci illərdə Duayt Eyzenhauer administrasiyası dövründə müşahidə olunmuşdu.

Lakin nəşrin yazdığına görə, bu arqumentlər Trampa ciddi təsir etməyib. ABŞ prezidenti NATO ilə münasibətləri gərginləşdirməsə də, Avropalı müttəfiqlərin İrana qarşı əməliyyatlar üçün hərbi bazalarını təqdim etməkdən imtina etməsindən narazılığını yenidən dilə gətirib.

Müzakirə zamanı Rutte Avropa tərəfdaşlarının dəstəyi ilə bağlı fikir bildirərkən Tramp onu kəskin şəkildə “yox” sözü ilə dayandırıb. Görüşün sonunda isə prezident baş katibin dizinə toxunaraq söhbəti yekunlaşdırıb.

Müəllif: Adəm