NATO Ankara Bəyannaməsini qəbul etdi

Türkiyədə keçirilən NATO sammitinin sonunda Ankara Bəyannaməsi qəbul edilib.

Publika.az xəbər verir ki, bu barədə NATO-nun “X” hesabında paylaşım edilib.

Həmin bəyənnaməni təqdim edirik:

- Biz, Şimali Atlantika Alyansına üzv dövlət və hökumət başçıları, Vaşinqton Müqaviləsinin 5-ci maddəsi çərçivəsində kollektiv müdafiəyə olan sarsılmaz öhdəliyimizi və transatlantik bağları bir daha təsdiqləmək üçün Ankarada bir araya gəldik. Bir müttəfiqə edilən hücum hamımıza edilmiş hücumdur. Birliyimiz, həmrəyliyimiz və kollektiv gücümüz azad və demokratik dövlətlərdən ibarət Alyansımızın bir milyard vətəndaşı üçün sülhün, təhlükəsizliyin və rifahın əsasını təşkil edir. Biz çəkindirmə və müdafiəyə dair 360 dərəcə yanaşmamıza sadiq qalırıq.

- Bu gün Ankarada biz 50 milyard ABŞ dollarından artıq həcmdə yeni satınalmalar elan edir və kollektiv istehsal gücünü genişləndirməyi, həmçinin innovasiyaların sürətləndirilməsi üçün sənaye ilə əməkdaşlığı inkişaf etdirməyi öhdəmizə götürürük. Müttəfiqlər arasında müdafiə ticarətinə maneələri aradan qaldırmaq istiqamətində fəaliyyətimizi davam etdirəcək və NATO-nun tərəfdaşlıqlarından istifadə edərək müdafiə sənayesinin potensialını və əməkdaşlığını maksimum səviyyəyə çatdıracağıq.

- ABŞ ilə əməkdaşlıq edən Avropalı müttəfiqlər və Kanada Alyansın müdafiəsinə görə daha böyük məsuliyyət daşımağa başlayırlar. NATO-nun çəkindirmə və müdafiə qabiliyyəti nüvə, adi silahlar və raketdən müdafiə imkanlarının uyğun balansına əsaslanır və bunlar kosmik və kiberməkandakı imkanlarla tamamlanır.

- Ukrayna transatlantik təhlükəsizliyə töhfə verir və müttəfiqlər Ukraynanın öz azadlığını, suverenliyini və ərazi bütövlüyünü müdafiə etməsinə göstərdikləri qəti və sarsılmaz dəstəyi yekdilliklə davam etdirirlər. Avropalı müttəfiqlər və Kanada hazırda Ukraynaya təhlükəsizlik yardımının böyük əksəriyyətini ikitərəfli və çoxtərəfli mexanizmlər vasitəsilə maliyyələşdirirlər.

- 2026-cı il üçün müttəfiqlər Ukraynaya 70 milyard avro həcmində hərbi texnika, yardım və təlim təqdim etməyi öhdələrinə götürür və 2027-ci ildə də ən azı eyni səviyyədə dəstəyi davam etdirmək barədə suveren öhdəliklərini təsdiqləyirlər.

- Alyans strateji rəqabətə, geniş yayılmış qeyri-sabitliyə, hibrid təhdidlərə və ümumi təhlükəsizlik mühitimizi səciyyələndirən təkrarlanan sarsıntılara cavab verməyə və onlara uyğunlaşmağa davam edir. Müttəfiqlər bir daha bəyan edirlər ki, İran heç vaxt nüvə silahına sahib olmamalıdır və İranı Hörmüz boğazında gəmiçilik azadlığına tam şəkildə hörmət etməyə çağırırlar.

Müəllif: Roza