Sağçıların qələbəsinə Rusiyadan ilk reaksiya - Almaniya oyanır

Almaniyanın Saksoniya-Anhalt əyalətində keçirilən seçkilərdə “Almaniya üçün Alternativ” (AfD) partiyasının nəticəsi Rusiyada diqqət çəkib.

Publika.az xəbər verir ki, rusiyalı senator Aleksey Puşkov seçkilərin nəticələrini şərh edərək Almaniyanın bir hissəsinin, görünür, “oyanmağa başladığını” bildirib.

“Almaniyanın bir hissəsi, görünür, oyanır. Almaniya kansleri Fridrix Mertsin antimilli siyasəti Saksoniya-Anhaltda müqavimətlə üzləşir. Görəsən, Almaniyanın qalan hissəsi də oyanacaqmı?” - deyə Puşkov "Telegram" kanalında yazıb.

Qeyd edək ki, “Almaniya üçün Alternativ” (AfD) Saksoniya-Anhalt əyalət parlamentinə seçkilərdə böyük fərqlə qalib gəlib. Partiya səslərin 43,8 faizini toplayıb. Əyalət hökumətinə rəhbərlik edən Xristian Demokrat İttifaqı (XDİ) isə 17,2 faiz səs alıb. Bu, AfD-nin əyalət seçkilərində tarixində göstərdiyi ən yüksək nəticədir.

Lakin AfD mütləq çoxluq əldə edə bilməyib. İlkin bölgüyə əsasən, partiya parlamentdəki 83 yerdən 39-nu qazanacaq. Müstəqil hökumət formalaşdırmaq üçün isə ən azı 42 mandat tələb olunur.

Müəllif: Adəm