Fidanın Bakıya səfərinin təfərrüatları açıqlandı: Nələr müzakirə olunacaq?

Türkiyənin xarici işlər naziri Hakan Fidan ikitərəfli münasibətlər, müdafiə əməkdaşlığı, regional proseslər və iqtisadi əlaqələri müzakirə etmək üçün 15-16 sentyabr tarixlərində Azərbaycana səfər edəcək.

Publika.az xəbər verir ki, bu barədə “Milliyet” məlumat yayıb.

Bildirilib ki, səfər çərçivəsində Fidanın Azərbaycanın xarici işlər naziri Ceyhun Bayramov ilə ikitərəfli və nümayəndə heyətləri səviyyəsində görüşlər keçirməsi, müdafiə naziri Zakir Həsənovla görüşü gözlənilir. Türkiyəli nazirin Prezident İlham Əliyev tərəfindən qəbul ediləcəyi də bildirilir.

Görüşlərin əsas gündəmində Türkiyə-Azərbaycan münasibətlərinin inkişafı, iki ölkə arasında 15 milyard dollarlıq ticarət dövriyyəsi hədəfi, enerji və nəqliyyat layihələri, müdafiə sənayesi, təhlükəsizlik və hərbi əməkdaşlıq məsələləri olacaq.

Tərəflərin Türk Dövlətləri Təşkilatında (TDT) əməkdaşlığı, həmçinin Türkiyənin ev sahibliyi edəcəyi 13-cü TDT Zirvə görüşü və COP31 ilə bağlı fikir mübadiləsi aparacağı gözlənilir.

Regional gündəmdə isə Azərbaycan-Ermənistan sülh prosesi və regional təhlükəsizlik məsələləri ön planda olacaq. Fidanın Azərbaycan və Ermənistan arasında davamlı sülhün qurulması üçün hazırkı dövrü “tarixi fürsət” kimi qiymətləndirəcəyi gözlənilir.

Bundan əlavə, Türkiyənin Qarabağda infrastrukturun bərpası, enerji və ticarət yollarının fəaliyyətinin təmin edilməsi və regional bağlantının gücləndirilməsi istiqamətindəki dəstəyinin də müzakirə olunacağı qeyd olunur.

Müəllif: Roza