Kivinin inanılmaz faydası üzə çıxdı

Kivi qəbizlik problemi yaşayan insanlar üçün bəzi hallarda almadan daha təsirli ola bilər. Diyetoloqlar Marci Vaske və Monika Ambern bu meyvənin bağırsaqların fəaliyyətinə təsirini açıqlayıblar.

Publika.az xəbər verir ki, mütəxəssislərin sözlərinə görə, gündə iki ədəd kivi yemək dörd həftə ərzində funksional bağırsaq pozuntuları olan insanlarda qəbizlik əlamətlərini azalda bilər.

Bunun əsas səbəblərindən biri kivinin tərkibində həm həll olunan, həm də həll olunmayan liflərin olmasıdır. Bu liflər suyu daha yaxşı saxlayaraq nəcis kütləsinin həcmini və konsistensiyasını yaxşılaşdırır. Diyetoloqlar bildiriblər ki, kivinin lifləri alma və hətta buğda kəpəyindəki liflərlə müqayisədə daha çox su saxlaya bilər.

Kivinin tərkibindəki aktinidin adlı ferment də həzm prosesinə kömək edir. Bu ferment zülalların parçalanmasında iştirak edir.

Alma da bağırsaqlar üçün faydalıdır. Onun tərkibindəki pektin suyu saxlayaraq nəcisin yumşalmasına kömək edir. Lakin kivinin bağırsaq hərəkətlərinə və nəcis konsistensiyasına təsiri bəzi araşdırmalarda daha nəzərəçarpan olub.

Mütəxəssislər qəbizliyin qarşısını almaq üçün yalnız bir məhsula deyil, ümumi qidalanmaya diqqət yetirməyi, kifayət qədər su və lif qəbul etməyi tövsiyə edirlər. Problem uzun müddət davam edərsə və ya tez-tez təkrarlanarsa, həkimə müraciət etmək lazımdır.

Müəllif: Adəm