Adi yaşıllığa baxmaq, görün hansı möcüzəyə səbəb olurmuş

Təbiətdə vaxt keçirməyin psixi sağlamlığımıza və mənəvi dünyamıza faydaları getdikcə daha çox aydın olur. Sadəcə olaraq, təbii elementlərə diqqət yetirərək, hətta şəhərin mərkəzində belə, əhvalınızı yaxşılaşdıra bilərsiniz.

Publika.az xəbər verir ki, “People and Nature” jurnalında dərc olunan məqalədə bildirilir ki, təbii və texnogen elementlərə diqqətin psixi sağlamlığa necə təsir etdiyini araşdırmaq üçün göz izləmə texnologiyasından istifadə edilib.

Tədqiqat 117 insanı əhatə edib. İştirakçılar təsadüfi olaraq üç qrupdan birinə təyin edilib. Şəhərdə və kampusda bələdçilərlə 45 dəqiqəlik gəzinti zamanı hər bir iştirakçı xüsusi eynək taxıb. Gəzintidən əvvəl və sonra iştirakçılar arasında onların əhval-ruhiyyəsini, narahatlıq səviyyələrini və gedişin bərpaedici xüsusiyyətlərini qiymətləndirən sorğu keçirilib.

Bu, təbiətdə vaxt keçirmək və rifahı yaxşılaşdırmaq arasında əlaqəni gücləndirərək vizual əlaqəni dəqiq və obyektiv ölçməyə imkan verib.

Məlum olub ki, hər bir qrup onlara diqqət etmələri xahiş edilən mənzərəyə baxmaq üçün daha çox vaxt sərf edib. Nəticələr isə heyrətamiz olub.

Yaşıl elementlərə daha çox diqqət yetirən iştirakçılar, boz elementlərə daha çox diqqət yetirənlərlə müqayisədə əhval-ruhiyyələrinin əhəmiyyətli dərəcədə yaxşılaşdığını və narahatlıqlarının azaldığını bildiriblər.

Gəzintidən sonra onlar daha yüksək səviyyədə müsbət emosiyalar və daha az narahatlıq nümayiş etdiriblər. Onlar həmçinin daha çox dincəldiklərini və cavanlaşdıqlarını deyiblər.

Beləliklə, alim Vitney Fleminq və həmkarlarının yeni araşdırmasının nəticələri öz təsdiqini tapıb. Özünüzü yaşxı hiss etmək üçün mütləq bir dağ və ya ucqar bir kənd lazım deyil. Ətrafınızdakı yaşıllıqla əhatə olunan məkanlara tez-tez getməyiniz belə sizə mənəvi rahatlıq və ruhi sağlamlıq bəxş edə bilər.

Cəmilə