Güclü maqnit qasırğası gəlir: Bu axşam Yer kürəsini vuracaq

Bu gün axşam saatlarında Yer kürəsində G3 kateqoriyalı güclü maqnit qasırğası gözlənilir.

Publika.az xəbər verir ki, bu barədə Rusiyanın Günəş Astronomiyası Laboratoriyasının mütəxəssisləri məlumat yayıblar.

Alimlərin sözlərinə görə, maqnit qasırğasının səbəbi Günəşdə baş vermiş güclü alışmalardan sonra Yer istiqamətinə atılan bir neçə plazma buludunun planetimizə çatması olacaq.

Mütəxəssislər bildiriblər ki, geomaqnit pozuntuları uzunmüddətli xarakter daşıyacaq. Belə ki, sonrakı püskürmələr nəticəsində yaranan plazma axınları daha əvvəl formalaşmış buludlara çataraq təxminən 200 milyon kilometr uzunluğunda vahid struktur yaradacaq.

Laboratoriyada qeyd olunub ki, belə şəraitdə Yerin həmin plazma buludunun içərisindən keçməsi ehtimalı olduqca yüksəkdir.

Xatırladaq ki, son maqnit qasırğası mayın 15-də qeydə alınmışdı. Həmin vaxt geomaqnit aktivliyi əvvəlcə G2 səviyyəsinə yüksəlmiş, təxminən üç saat davam etdikdən sonra zəifləmişdi. Ertəsi gün isə aktivlik yenidən G1 səviyyəsinə çatmış və daha sonra tədricən səngimişdi.

Adəm