İşi mükəmməl qurmaq üçün çalışırıq - Səfər Mehdiyev

Elektron ticarətlə alış-veriş zamanı sifariş edilən məhsulu sifariş etdiyiniz zaman əgər gömrük sistemində görünmürsə, deməli, məhsul hələ çatmayıb. Bu, şirkətin öhdəliyidir.

Publika.az xəbər verir ki, bu sözləri Dövlət Gömrük Komitəsinin sədri Səfər Mehdiyev bu gün keçirilən mətbuat konfransında deyib. O bildirib ki, şirkətlərin dövriyyəsi artdığı üçün gün ərzində gələn bağlamaları realizasiya etməyə vaxt çatmır: "Əgər bağlama tapılmırsa, bu, gömrüyün problemi deyil. Bu gün 500 min bağlamadan danışırıqsa, bu rəqəm yaxın zamanda 1 milyona çatacaq. Prosesin asanlaşdırılması üçün şirkətlərə də təklif etmişik ki, realizasiya aparatları alsınlar. Əgər məhsul vaxtında bəyan olunubsa, 80-85% yük elə həmin gün şirkətin anbarına daxil olur. Gecikmə varsa, problem daşıma şirkəti ilə əlaqəlidir. İşi mükəmməl qurmaq üçün çalışırıq. Hazırda yeni layihə üzərində işləyirik. Yaxın günlərdə şəhərin mərkəzində yeni mərkəz açılacaq. Vətəndaşlar şirkətlərdən məhsullarını daha rahat şəkildə əldə edəcəklər".