Neft-kimya məhsullarına tələbat azalmayacaq - Anar Məmmədov

"Pandemiyanın neft-kimya sektoruna mənfi təsirləri müşahidə olunmadı, əksinə, müsbət təsirlərini hiss etdik".

Publika.az xəbər verir ki, bunu "SOCAR Türkiyə" Emal və Neft-Kimya Bölməsinin rəhbəri, "Petkim"in Baş direktoru Anar Məmmədov Türkiyənin İzmir şəhərində baş tutan mətbuat konfransında deyib.

O bildirib ki, yeni ştamın meydana gəlməsinin "Petkim"ə neqativ təsiri olmayacaq, hətta böyük ehtimalla müsbət təsiri özünü göstərəcək: "Ümumiyyətlə, bu dövrdə neft-kimya məhsullarına tələb azalmadı, əksinə, artım oldu. Yeni ştam, köhnə ştam - fərq etmir. Tibb məhsullarına, plastik, polimer məhsullara tələb artdı".

Anar Məmmədov əlavə edib ki, ümumilikdə enerji məhsullarına tələb azalsa da, növbəti dövrdə neft-kimya məhsullarına tələbat azalmayacaq: "Eləcə də, enerji məhsullarına azalan tələb "STAR" NEZ-in fəaliyyətinə böyük təsir göstərməyəcək. "STAR" NEZ ən effektiv və ən son texnologiyada qurulan zavoddur. Biz hazırda "Petkim" üçün naftanı təmin edirik. Gələcəkdə digər məhsulları da təmin edə bilərik. "STAR" NEZ-də benzinin istehsalında istifadə olunan reformator da emal edilir. Gələcəkdə bununla bağlı da layihələr ola bilər".