Bakıda evləri talayan qadın ələ keçdi - FOTO

Qaradağ rayonunun Ümid qəsəbəsində evdən oğurluq edilib.

Daxili İşlər Nazirliyinin mətbuat xidmətindən Publika.az-a verilən məlumata görə, zərərçəkən Qaradağ Rayon Polis İdarəsinə müraciət edərək evdən 1000 manat məbləğində pul və 600 manat dəyərində qızıl-zinət əşyalarının oğurlandığını bildirib. Eyni məzmunlu şikayətlərlə müraciət edən Ümid qəsəbəsində yaşayan daha iki sakinin ərizəsi də polis idarəsində qeydə alınıb. Onlar da evlərindən ümumilikdə 4 min manata yaxın qızıl-zinət əşyalarının oğurlandığını bildiriblər. Aparılan araşdırmalar, eləcə də hadisə yerlərinə baxış keçirilən zaman oğurluqların eyni şəxs tərəfindən törədildiyi müəyyənləşdirilib.

Hadisələri törətməkdə şübhəli bilinən Ağdam rayon sakini Zeynəb Quliyeva Qaradağ Rayon Polis İdarəsinin əməkdaşlarının həyata keçirdikləri təxirəsalınmaz əməliyyat-axtarış tədbiri nəticəsində saxlanılıb. O, izahatında etdiyi oğurluqları etiraf edib. Araşdırmalar zamanı onun Səbail rayonu Bayıl qəsəbəsində də bir evdən oğurluq etdiyi müəyyənləşib.

Faktlarla bağlı Qaradağ Rayon Polis İdarəsində cinayət işi başlanıb. Zeynəb Quliyeva barəsində məhkəmənin qərarı ilə həbs qətimkan tədbiri seçilib.