Tanınmış klinikada xəstə əməliyyat zamanı öldü: Cərrah saxta imiş

Moskvada plastik əməliyyat etdirmək istəyən 39 yaşlı qadın klinikada dünyasını dəyişib.

Publika.az Rusiya mediasına istinadən xəbər verir ki, hadisə paytaxtın Krasnoproletarskaya küçəsindəki tanınmış klinikalardan birində baş verib.

Məlumata görə, 39 yaşlı qadın çiyin nahiyəsinin konturunu düzəltdirmək (braxioplastika) üçün həkimə müraciət edib. Əməliyyatdan öncə xəstəyə ağrıkəsici olaraq "lidokain" vurulub. İnyeksiyadan dərhal sonra qadının vəziyyəti pisləşib. Məlum olub ki, onda dərman preparatına qarşı anafilaktik şok yaranıb. Hadisə yerinə təcili yardım çağırılsa da, qadının həyatını xilas etmək mümkün olmayıb.

Araşdırmalar zamanı daha bir sarsıdıcı fakt üzə çıxıb. Belə ki, proseduru həyata keçirən mütəxəssisin həmin klinikada kabinet icarəyə götürdüyü və bu növ tibbi fəaliyyətlə məşğul olmaq üçün heç bir lisenziyasının olmadığı müəyyən edilib.

Hazırda faktla bağlı Tverskaya Rayon Prokurorluğu tərəfindən araşdırma aparılır. Mərhumun yaxınları ölümün dəqiq səbəbini öyrənmək üçün məhkəmə-tibbi ekspertizasının nəticələrini gözləyirlər.