Müşavirin evinə "Şahid" girdi - Xəstəxanalıq olan rəsmidən xəbər var - FOTO

Ukrayna Müdafiə Nazirinin müşaviri, tanınmış hərbi ekspert Serqey Beskrestnovun evinə pilotsuz uçuş aparatı (PUA) çırpılıb.

Publika.az xəbər verir ki, bu barədə məlumatı Serqey Beskrestnov "Facebook" səhifəsində paylaşıb.

O bildirib ki, Rusiya ordusunun gecə saatlarında həyata keçirdiyi kütləvi hücum zamanı reaktiv mühərrikli "Şahid" dronlarından biri birbaşa onun evini hədəf alıb. Zərbə nəticəsində ev tamamilə dağılıb, müşavir isə xəsarət alaraq xəstəxanaya yerləşdirilib.

Müşavir hadisə anını belə təsvir edib: "Bir ədəd idarə olunan reaktiv "Şahid" evimin divarına çırpıldı. Evim artıq yoxdur. Mən də xəsarət aldım, amma əsas odur ki, möcüzə nəticəsində sağ qaldım".

Qeyd edək ki, aprelin 20-nə keçən gecə Rusiya ordusu Ukrayna ərazisinə 142 zərbə PUA-sı ilə hücum edib.

Hücumda "Şahid"lərlə yanaşı, "Qerbera" və "İtalmas" tipli pilotsuz aparatlar da iştirak edib. Ukrayna Hava Hücumundan Müdafiə qüvvələri 113 dronu zərərsizləşdirsə də, 18 fərqli nöqtədə düşmən PUA-larının hədəfə çatdığı bildirilir.

Müəllif: Adəm