FHN silsilə maarifləndirmə tədbirləri keçirdi

Fövqəladə Hallar Nazirliyinin aidiyyəti qurumları tərəfindən fövqəladə hallarla bağlı davranış qaydaları barədə əhalinin maarifləndirilməsi məqsədilə silsilə tədbirlər keçirilib.

Bu barədə Publika.az-a Fövqəladə Hallar Nazirliyinin Mətbuat xidmətindən məlumat verilib.

Belə ki, FHN-in Dövlət Yanğın Nəzarəti, Kiçikhəcmli Gəmilərə Nəzarət və Sularda Xilasetmə Dövlət xidmətlərinin mütəxəssislərinin də iştirakı ilə Sumqayıt Regional Mərkəzi (RM) tərəfindən “AF Hotel & Aqua Park” kompleksində və Abşeron rayonu, Fatmayı kənd Ailə Sağlamlıq Mərkəzində, Gəncə RM tərəfindən “Azəriqaz” İB-nin Gəncə Regional Qaz İstismar İdarəsində, Qarabağ RM tərəfindən Ağdam rayonu, İmamqulubəyli kənd körpələr evi-uşaq bağçasında və Bərdə Dövlət Peşə Təhsil Mərkəzində, Şimal RM tərəfindən Şabran Rayon İcra Hakimiyyəti başçısının Qorğan kənd İnzibati ərazi dairəsi üzrə nümayəndəliyində, Aran RM tərəfindən “AzTelekom” İstehsalat Birliyinin Aran Regional filialının Yevlax rayon şöbəsində, Şimal-qərb RM tərəfindən Şamaxı regional “ASAN xidmət” mərkəzində, Dövlət Yanğın Nəzarəti Xidmətinin təşkilatçılığı ilə Xətai Tibb Mərkəzində maarifləndirmə tədbirləri keçirilib.

Tədbirlərin keçirilməsində məqsəd baş verə biləcək təbii və texnogen xarakterli fövqəladə hadisələrlə bağlı zəruri davranış qaydaları barədə vətəndaşlara müvafiq biliklərin verilməsi olub.

Tədbirlərdə fövqəladə halların təsnifatı, ölkəmiz üçün xarakterik olan fövqəladə hallar, o cümlədən yanğın və zəlzələ ilə bağlı zəruri davranış qaydaları barədə ətraflı məlumat verilib, FHN-in “112” qaynar telefon xəttinin təyinatı izah olunub və ilkin yanğınsöndürmə vasitələrindən istifadə qaydaları əyani şəkildə nümayiş etdirilib.

İnteraktiv formada keçirilən tədbirlər zamanı suallar ətraflı cavablandırılıb.