Messi formasını bağışladığı əfqan uşaqla görüşdü - - FOTO/VİDEO

Əfqanıstanın azyaşlı sakini, üzərinə "Barselona" klubunun və Argentina yığmasının futbolçusu Lionel Messinin adı yazılmış "köynəyi"nə görə internet ulduzu olmuş Mürtəza Əhmədi öz pərəstişgarı ilə görüşüb.

Publika.az xəbər verir ki, bu barədə "The Guardian" yazıb. Məlumata görə, 2022-ci ildə Qətərdə keçiriləcək futbol üzrə dünya çempionatının təşkilat komitəsi Messiylə onun kiçik azarkeşinin videogörüntülərini yayıb. Görüş əmirliyin paytaxtı Dohada olub. Argentinalı futbolçu bura yerli klubla "Barselona"nın yoldaşlıq matçına gəlib.

Xatırladaq ki, əfqanıstanlı uşağın sellofan paketdən hazırlanmış futbolçu "köynəyi" bu ilin yanvarında internetdə məşhur olub. Həmin vaxt Əfqanıstanın Futbol Federasiyası futbolçuyla onun azyaşlı pərəstişkarının görüşünü təşkil etməyə söz vermişdi. Fevralda isə Messi oğlana avtoqrafı ilə birlikdə Argentina yığmasının əsl formasını göndərdi.

Qeyd edək ki, Messinin öz futbolçu köynəyini hədiyyə etdiyi oğlanın ailəsi uşağın həyatı üçün yaranmış təhlükəyə görə Əfqanıstandan qaçıb.