Çempionlar Liqasında ingilis finalı - VİDEO

Bu gecə Çempionlar Liqasında ikinci finalçı müəyyənləşib.

Publika.az xəbər verir ki, "Ayaks" və "Tottenhem" komandaları arasında Amsterdamda keçirilən qarşılaşmada ingilislər geridönüş etməyi bacarıblar.

Ev oyunda 1:0 hesabı ilə uduzan London təmsilçiləri səfər matçında 3:2 hesabı ilə qələbə qazanıb. İlk 2 qolu məhz "Ayaks" vurub. Kapitan Matteys De Liqt 5-ci, Hakim Ziyeş isə 36-cı dəqiqədə fərqlənib. Lakin fasilədən sonra "Tottenhem" fəallaşaraq, bu qolların əvəzini çıxıb. Lukas Moura 55 və 59-cu dəqiqələrdə fərqlənərək, hesabı bərabərləşdirib. London komandası finala yüksəlmək üçün lazım olan daha bir qolu isə 90+6-cı dəqiqədə vurub.

Bununla da, "Tottenhem" tarixində ilk dəfə qitənin ən nüfuzlu klub turnirinin finalına yüksəlib.

Qeyd edək ki, "Tottenhem" finalda "Liverpul" ilə üz-üzə gələcək. Final matçı iyunun 1-də Madriddəki "Vanda Metropolitano" stadionunda keçiriləcək.


8 may

"Ayaks" (Hollandiya) - "Tottenhem" (İngiltərə) - 2:3
Qollar: De Liqt, 5 (1:0), Zieş, 35 (2:0), L.Moura, 55, (2:1), 59 (2:2), 90+6 (2:3)
İlk oyun - 1:0


7 may

"Liverpul" (İngiltərə) - "Barselona" (İspaniya) - 4:0

İlk oyun 0:3