"El-klasiko" həyəcanı: Ançelottinin taleyi həll olunacaq

Bu gün futbol üzrə İspaniya kubokunun qalibi müəyyənləşəcək.

Publika.az xəbər verir ki, Sevilya Olimpiya Stadionunda keçiriləcək həlledici qarşılaşmada "Barselona" və "Real" üz-üzə gələcək.

Bu görüş komandaların mövsümün ilk titulunu qazanması baxımından önəmlidir. "El-klasiko"nun nəticəsi Madrid klubunun baş məşqçisi Karlo Ançelottinin taleyini də həll edə bilər. Çünki məğlubiyyət fonunda "Los-Blankos" bu mövsüm Çempionlar Liqasından sonra növbəti turnirdə də titulsuz qala bilər.

"Barsa" isə "qızıl trebl" arzusundadır. Bunu reallaşdırmaq üçün isə ilk olaraq ölkə kubokunu qazanmaq lazımdır.

Komandalar meydana itkilərlə çıxacaq. "Barselona" "qol silahı" Robert Levandovskidən, "Real" isə yarımmüdafiəçisi Eduardo Kamavinqadan zədə səbəbilə məhrum olub.

Görüşdən əvvəl yaşananalar isə matçı prinsipial edir. "Real" rəhbərliyi hakimlərin oyundan əvvəl klubun əleyhinə səsləndirdiyi fikirlərə görə matçdan imtina etmək istəyib. Lakin klub İspaniya Kral Futbol Federasiyasının müdaxiləsindən sonra fikrini dəyişib.

İspaniya kuboku, final
26 aprel
00:00 Barselona - Real
Baş hakim: Rikardo de Burgos Benqoetxea
Sevilya. Olimpiya stadionu.

Heybət