“Real”ın ulduzu məhkəmə qarşısına çıxarılır: Görün nə edib

Braziliya millisinin və “Real Madrid”in hücumçusu Vinisius Junior ad gününü qeyd etmək üçün Rio-de-Janeyroda təşkil etdiyi böyük şənlik zamanı sakitliyi pozmaqda ittiham olunaraq Braziliya məhkəməsinə çıxarılacaq.

Publika.az xəbər verir ki, bu barədə “Mundo Deportivo” məlumat yayıb.

Mənbənin bildirdiyinə görə, məhkəməyə xırda cinayətlərin törədilməsinə baxılması tapşırılıb. İttihamlar Braziliya millisinin hücumçusunun 25 yaşını qeyd etdiyi mülkün qonşusunun şikayətindən irəli gəlir.

“Daily O Globo”nun istinad etdiyi iddiaya görə, toy və ya korporativ tədbirlər kimi böyük tədbirlərə ev sahibliyi etmək üçün nəzərdə tutulmuş dəbdəbəli malikanədə baş tutan şənlik xeyli səs-küyə səbəb olub və yerli sakinlərin dincliyini pozub.

Şikayətçi polisə zəng vurduğunu, polis gəldikdən sonra məclisdə olanlardan səsi azaltmağı xahiş etdiyini bildirib. Vinisius və qonaqları polisə tabe olublar, lakin onlar getdikdən sonra yenidən səs-küy salmağa başlayıblar.

Bu iş üzrə hazırlıq iclası noyabrın 6-da keçiriləcək. Braziliya qanunlarına görə, vətəndaşların dincliyini pozmaq 15 gündən üç aya qədər həbs və ya cərimə ilə cəzalandırılır.