"Barselona"nın ulduzunun xanımı FİFA-ya üsyan etdi: Ədalətsizlik! - FOTOLAR

FİFA-nın “Barselona”nın vingeri Rafinyanı 2025-ci ilin simvolik yığmasına daxil etməməsi futbolçunun ailəsində ciddi narazılıqla qarşılanıb.

Publika.az xəbər verir ki, braziliyalı ulduzun həyat yoldaşı nəticələr açıqlanan kimi "Instagram"da dörd sərt hekayə paylaşıb və səsvermənin yekunlarını kəskin tənqid edib. O, emosiyalarını açıq şəkildə ifadə edərək diplomatik ifadələrdən çəkinməyib:

“Artıq bunu gizlətmirlər! 62 qol ötürməsi və qolu var... Amma o, ən yaxşı on birliyə layiq deyil?”

“ƏDALƏTSİZLİK!”

“Rafinya basketbolçudur, yoxsa nə?”

Bu paylaşımlarla o, həyat yoldaşının futbol nailiyyətlərinin heç bir obyektiv səbəb olmadan nəzərə alınmadığını vurğulayıb, Rafinya mövsüm ərzində 62 məhsuldar nəticə ilə seçilib və La Liqa ilə İspaniya Kubokunu qazanıb.

Futbolçunun özü isə vəziyyətə daha təmkinli yanaşıb. Rafinya stadion işıqları fonunda uzaqlara baxdığı bir foto paylaşıb və heç bir açıqlama yazmayıb. Azarkeşlər bunu FİFA-nın qərarına səssiz etiraz və məyusluq işarəsi kimi qiymətləndiriblər.

Qeyd edək ki, "The Best" mükafatı üzrə səsvermədə Rafinyanı birinci yerə yalnız beş ölkənin milli komanda kapitanları – Cəbəllütariq, Seyşel adaları, Tonqa, Uqanda və Özbəkistan layiq görüb.

Xatırladaq ki, 2025-ci ilin ən yaxşı futbolçusu "The Best FIFA Football Awards" mərasimində PSJ-nin vingeri Usman Dembele seçilib. İlin simvolik yığmasına isə “Barselona”dan Pedri və Lamin Yamal daxil edilib, Rafinya isə namizədlər siyahısında qalıb.

Heybət