Qalmaqallı finalın fəsadı: 18 azarkeş həbsxanadadır

Afrika Millətlər Kubokunun final oyununda Seneqal azarkeşləri qayda pozuntularına yol verdiklərinə görə cəzalandırılıblar.

Publika.az AFP-yə istinadən xəbər verir ki, Mərakeş məhkəmələri tərəfindən 18 azarkeşə üç aydan bir ilə qədər həbs cəzası verilib. Onlar xuliqanlıq, zorakılıq aktları, o cümlədən hüquq-mühafizə orqanlarının əməkdaşlarına qarşı zorakılıq hərəkətləri, idman avadanlıqlarına zərər vurma, meydana daxil olma və müxtəlif əşyalar atmada təqsirli biliniblər.

Onlardan doqquzuna bir il həbs və 5000 dirhəm (təxminən 460 avro) cərimə, daha altı nəfərə altı aya qədər həbs və 2000 dirhəm (180 avro) cərimə, digərlərinə isə üç ay müddətinə həbs və 1000 dirhəm (90 avro) cərimə cəzası verilib.

Vəkil Patrik Kabu bu cür tədbirlərin “anlaşılmaz” olduğunu və müştərilərinin “günah keçisi”nə çevrildiyini bildirib.

Həbs cəzasına məhkum edilən azarkeşlər arasında Əlcəzair əsilli bir fransız da var – o, su şüşəsi atdığına görə üç ay həbs cəzasına məhkum edilib.

Prokurorluq bildirib ki, əsasən CCTV görüntülərinə və xəsarət alan hüquq-mühafizə orqanları və təhlükəsizlik işçilərinin tibbi arayışlarına əsaslanıblar.