Adını Messi və Ronaldo ilə birlikdə tarixə yaza bilər: Şans yarandı

Meksika millisinin qapıçısı Gilyermo Oçoa tarixə düşə bilər.

Publika.az xəbər verir ki, o, futbol üzrə dünya çepionatlarına ən çox qatılan futbolçulardan biri ola bilər.

Buna səbəb yığmanın və “Amerika” klubunun qapıçısı Luis Malaqonun ciddi zədə almasıdır. 29 yaşlı qolkiper KONKAKAF Çempionlar Kubokunun 1/8 final mərhələsində “Filadelfiya Union”a qarşı keçirilən oyunda (1:0) sıradan çıxıb. Aparılan müayinələr nəticəsində Malaqonda Axilles vətərinin qopması aşkarlanıb.

DAZN-in məlumatına görə, bu zədə səbəbindən Meksika millisinin qapıçısı 2026-cı il dünya çempionatını buraxacaq.

Malaqonun zədəsi 40 yaşlı təcrübəli qapıçı Gilyermo Oçoaya ev sahibliyi edəcəkləri mundialın iştirak ərizəsinə düşmək şansı yarada bilər. ABŞ və Kanadanın da qəbul edəcəyi turnir Kiprin AEL klubunda çıxış edən Oçoa üçün karyerasında altıncı dünya çempionatı ola bilər.

Bildirilir ki, Meksika millisinin heyətinə “Çivas”ın qapıçısı Raul Rangel və “Santos Laquna”nın qolkiperı Karlos Asevedo da daxil ediləcək. Oçoanın isə bu qapıçılar arasında ehtiyat oyunçu kimi yer alacağı gözlənilir.

Bu baş versə, Gilyermo əfsanəvi futbolçular Lionel Messi (Argentina) və Kriştiano Ronaldo (Portuqaliya) ilə mundiallarda ən çox iştirak edən futbolçu ola bilər. Bunun üçün hər iki ulduzun adı mundialın iştirak ərizəsində yer almalıdır.

Heybət