Gürcüstan millisində görünməmiş fırıldaq

Gürcüstanın reqbi millisinin altı oyunçusu və bir işçisi dopinq nümunələrinin dəyişdirilməsində iştirak edib.

Publika.az xəbər verir ki, bu barədə Ümumdünya Antidopinq Agentliyinin (WADA) mətbuat açıqlamasında deyilir:

“WADA Gürcüstan Antidopinq Agentliyinə (GADA) etimadı itirib. WADA və Dünya Reqbisi tərəfindən aparılan genişmiqyaslı birgə araşdırma nəticəsində nümunə mübadiləsi ilə bağlı beş hal aşkar edilib. Bundan əlavə, GADA-nın Gürcüstan milli komandasının oyunçularını planlaşdırılan testlər barədə xəbərdar etdiyi və test prosesinə lazımi nəzarət etmədiyi müəyyən edilib.

Araşdırmanın nəticələri zəruri tədbirlər görülməsi üçün Gürcüstan hökumətinə təqdim edilib.

Gürcüstan reqbisində baş verənlər çox qəribədir və Gürcüstan idmanına, hökumətinə, eləcə də dünya miqyasında reqbiyə şok dalğası yaradacaq”, – WADA prezidenti Vitold Banka bildirib.

WADA rəsmiləri həmçinin digər idman növlərində iştirak edən gürcü idmançılarından götürülmüş nümunələri də nəzarətə götürüblər.