Kamara bizim üçün qeyri-tipik oyunçudur - Rəşad Eyyubov

Azərbaycanın U-21 millisinin baş məşqçisi Rəşad Eyyubov jurnalistlərə açıqlama verib.

Publika.az xəbər verir ki, baş məşqçi, milli komandaya yeni dəvət olunan futbolçular barədə də danışıb:

“Heyətdə yeni cəlb olunan futbolçular var. Həm əvvəlki oyunçular, həm də yeni futbolçulara ümidlər böyükdür. Bu gün Lorenzo Mezzotero ilk məşqinə çıxdı. Bir məşqlə nəsə demək olmaz. Gözləntilərimiz var. Mustafa Kamara isə sabah ilk məşqinə çıxacaq. O, bizim üçün qeyri-tipik oyunçudur. Çünki texnikası və oyun tərzi fərqlidir. Kamaranın yığma üçün faydalı olacağını düşünürəm”.

Eyyubov, Türkiyədə keçirəcəkləri yoxlama oyunlarında yaxşı nəticə qazanmaq istədiklərini söyləyib:

“Türkiyədə bizi iki yoxlama oyunu gözləyir. Amma heç vaxt rəsmi matçlarla yoxlama oyunlarını ayırmıram. Məqsədimiz ancaq maksimum nəticə əldə etmək olacaq”.

U-21 mayın 28-dən 30-dək Bakıda, mayın 31-dən iyunun 10-dək isə Türkiyənin İsparta şəhərində təlim-məşq toplanışında olacaq. Türkiyədəki hazırlıq çərçivəsində iyunun 6-da Bəhreyn, 9-da isə Qırğızıstanın müvafiq yaş qrupundan ibarət komandasına qarşı iki yoxlam oyunu keçiriləcək. Hər iki matçın saat 18:00-da başlanması nəzərdə tutulur.