FİFA DÇ-dən sonra Tuxeli cəzalandıracaq - Səbəb

İngiltərə millisinin baş məşqçisi Tomas Tuxel 2026-cı il Dünya Kubokundan sonra FİFA-nın qadağası ilə üzləşəcək.

Publika.az xəbər verir ki, beynəlxalq federasiya turnir zamanı rəsmiləri açıq şəkildə tənqid etdiyinə görə bir neçə oyunçu və məşqçiyə sanksiyalar tətbiq etməyi planlaşdırır. FİFA hakimlərə təzyiqin qarşısını almaq üçün cəzaların sonrakı oyunlara keçirilməsi mexanizmini tətbiq etmək niyyətindədir.

Tuxelin potensial cəzası, Dünya Kubokunun 1/8 final mərhələsində Meksika ilə oyundan (3-2) sonra etdiyi sərt şərhlərdən qaynaqlanır. Alman məşqçi VAR müdaxiləsindən və hakim Alireza Faqhaninin müdafiəçi Carrell Kuansı meydandan qovmasından son dərəcə narazı idi.

“Bu, sadəcə kifayət deyil. Hakim istənilən vaxt istənilən komandanı meydandan kənarlaşdıra bilər. Bu, xaos və etibarsızlıqdır. İndi texniki zonadan kənara çıxdığınız anda sizə qışqıran iki dördüncü hakim var”, – deyə “Mirror” qəzeti Tuxeldən sitat gətirib.

Əgər FİFA hakimlərin hesabatlarına əsasən cəzanı təsdiqləsə, Tuxelin cəzası 2026-cı ilin payızına qədər təxirə salınacaq və İngiltərənin UEFA Millətlər Liqasındakı rəsmi oyunlarına və ya gələcək turnirlərə təsir edəcək.