Məşhur futbolçunu ABŞ-a buraxmadılar - Trampdan kömək istədi

İspaniya millisinin keçmiş müdafiəçisi Joan Kapdevila əvvəllər İran ərazisində oyunda iştirak etdiyinə görə 2026-cı il Dünya Kubokunun finalına baxmaq üçün ABŞ-a gedə bilməyib və indi məsələnin həllində prezident Donald Trampdan kömək istəyir.

Publika.az xəbər verir ki, bu barədə “Marca” məlumat yayıb.

O, Trampa “X” sosial media saytında müraciət edib:

“Mənə kömək lazımdır, Donald Tramp! Mənə sadəcə ESTA (ABŞ-a Səyahət üçün Elektron Sistem) vizam rədd edildiyi üçün uşaqlarımla finala gedə bilməyəcəyimi dedilər”.

Kapdevila qeyd edir ki, 2010-cu ildə Dünya Kubokunu qazandığı keçmiş komanda yoldaşları ilə birlikdə bu ilki Dünya Kubokunun finalına qatıla bilməyəcəyinə görə son dərəcə kədərlidir.

“Kimsə mənə bu işdə kömək edə bilərmi? 2010-cu il komanda yoldaşlarımla birlikdə olmağı və bu komandanı dəstəkləməyi nə qədər arzuladığımı təsəvvür edə bilməzsən.

İnana bilmirəm ki, ABŞ-a girişim rədd edilir və futbolu çox sevən uşaqlarımla belə gözəl vaxt keçirməyi qaçıracağam. Əgər kimsə bunu necə həll edəcəyini bilirsə, mən sizə sonsuza qədər minnətdaram”, – deyə o bildirib.

Oyunçu qeyd edib ki, 10 il əvvəl İranda oyun keçirdiyi üçün ABŞ-a girişinə icazə verilməyib.

“Mənə rədd cavabı verildi, çünki 10 il əvvəl, 2016-cı ildə İranda bir oyun keçirmişdim və görünür, İranda olmusunuzsa ABŞ-a daxil ola bilməzsiniz”.