“Sabah”la oyunda het-trik etdi, PSJ və “Real”ın transfer siyahısına düşdü

Avropanın nəhəng klubları “Mançester Yunayted”in 15 yaşlı futbolçusu JJ Qabrielin transferi üçün hərəkətə keçib. “Kiçik Messi” ləqəbi ilə tanınan gənc istedadın İngiltərə klubundan ayrılmaq istəyi transfer gündəmini zəbt edib.

Publika.az xəbər verir ki, Qabriel “Mançester Yunayted” akademiyasının ən perspektivli futbolçularından biri hesab olunur. O, UEFA Gənclər Liqasında Azərbaycanın “Sabah” klubuna qarşı matçda het-trik edib. Bundan başqa, yayda Stokholmda “Atletiko Madrid”ə qarşı keçirilən hazırlıq oyununda meydana çıxaraq “Mançester Yunayted” tarixində əsas komandanın formasını geyinən ən gənc futbolçu olub.

Klub gənc oyunçunu itirmək niyyətində deyil və onunla müqaviləni yeniləməyə çalışır. Qabrielin hazırkı sözləşməsi daha bir il qüvvədədir. “The Athletic”in məlumatına görə, rəhbərlik futbolçunun komandadan asanlıqla ayrılmasına razı deyil və onu qərarından daşındırmağa çalışır.

Bununla belə, Qabrielin oktyabrın 6-da 16 yaşı tamam olduqdan sonra vəziyyətin dəyişə biləcəyi bildirilir. İngiltərə qanunvericiliyinə əsasən, müəyyən şərtlər daxilində 16 yaşlı futbolçunun ölkədən ayrılmasına imkan yarana bilər. Qabrielin atası İrlandiya millisində çıxış edib, anasının isə Kipr mənşəli olduğu qeyd olunur.

Gənc futbolçuya Avropanın bir sıra aparıcı klublarının maraq göstərdiyi bildirilir. “Çelsi”, “Bavariya”, “Real Madrid” və “Barselona”nın onun vəziyyətini izlədiyi, PSJ-nin isə transfer uğrunda mübarizəyə ciddi şəkildə qoşulduğu vurğulanır.

Məlumata görə, “Real Madrid” Qabriel üçün xüsusi plan hazırlayıb. Madrid klubu onu “Kastilya” komandasına cəlb etməyi düşünür. Gənc futbolçunun da İspaniya nəhənginə keçmək variantına müsbət yanaşdığı iddia olunur.

PSJ isə son illərdə gənc və perspektivli futbolçuların inkişafına xüsusi diqqət ayırır. Buna görə Paris klubunun da Qabriel uğrunda mübarizədə fəal olduğu bildirilir.

Hazırda JJ Qabrielin gələcəyi ilə bağlı yekun qərar verilməyib. “Mançester Yunayted” onu komandada saxlamağa çalışsa da, futbolçuya maraq göstərən klubların sayı vəziyyəti daha da mürəkkəbləşdirir.