Cem Adrian Nahidə ilə duet oxudu – FOTO\VİDEO

Türkiyənin məşhur musiqiçisi Cem Adrian Bakıda konsert verib.

Publika.az xəbər verir ki, musiqiçi dünən "Elektra Hall" səhnəsində solo konsert proqramı ilə çıxış edib. Kədərli mahnıların müəllifi kimi tanınan Cem Adrian izdiham dolu konsert salonunda pərəstişkarlarına unudulmaz gecə yaşadıb. Pərəstişkarları sənətçinin, demək olar ki, bütün mahnılarını onunla əzbər oxuyub.

Konsertdən və pərəstişkar ordusunun sevgisindən təsirlənən sənətçi Bakıda bu qədər sevildiyindən xəbərsiz olduğunu etiraf edib. Konsertin ən yaddaqalan məqamlarından biri də Cem Adrianla müğənni Nahidə Babaşlının dueti olub.

Musiqi gecəsini izləməyə gələn qonaqlar arasında əməkdar artist Tünzalə Ağayeva da olub. Ulduz Cem Adrianla şəklini instaqramda paylaşaraq təəssüratlarını qeyd edib:

“Kimsəyə bənzəməyən sənətkarlar dünyaya artıq sənətkarlıqla gəlirlər, Türkiyə müasir musiqisində ən kreativ, olduqca yüksək musiqi duyumlu, öz tərzi olan, işinin peşəkarı olan Cem bəy, Bakıya xoş gəlmisən . Əla bir konsert idi, zövq aldım”.