Əməkdar artist Prezidentə təşəkkür etdi – FOTO

Çox xoşbəxtəm ki, bu ad günümü qalib Azərbaycanın vətəndaşı kimi qeyd edirəm! Bu xoşbəxtliyi bizə yaşadan, şəhadəti ilə millətimizi dirçəldən şəhidlərimizin ruhu qarşısında baş əyirəm!

Publika.az xəbər verir ki, bu sözləri Əməkdar artist Xəyyam Nisanov İnstaqram hesabında yazıb. 38 yaşını qeyd edən sənətçi doğum günü ərəfəsində Əməkdar artist adına layiq görüldüyü üçün xüsusilə sevincli olduğunu bildirib:

“Əziz Prezidentimiz, Ali Baş Komandan cənab İlham Əliyevə, vətən yolunda sağlamlığını itirən qazilərimizə və Azərbaycan Ordusunun hər bir əsgərinə, zabitinə bir ömür boyu minnətdar olacağam. Mən həm də ona görə xoşbəxtəm ki, yeni yaşımı Azərbaycan Respublikasının Əməkdar artisti kimi qeyd edirəm. Bu, mənim sənətimə olan çox yüksək dəyərdir. Bu yüksək etimada görə mən bir daha cənab Prezidentə təşəkkürümü bildirmək istəyirəm. Bu mükafata layiq görülməyimin ən ilk səbəbkarı atamdır, sənəti ondan öyrəndim və indi onun yolunu davam edirəm. Həmçinin anama və ailəmə məni hər zaman dəstəklədikləri, inandıqları üçün, müəllimlərimə məni yetişdirib formalaşdırdıqları üçün, dostlarıma məni hər zaman irəli və inkişafa inandırdıqları və ruhlandırdıqları üçün, həmkarlarıma mənim sevincimə şərik olduqları üçün, sadiq dinləyici və izləyicilərimə, pərəstişkarlarıma məni sevib dinlədikləri üçün təşəkkür edirəm!”