KVN komandamız niyə "Şuşa" adını dəyişdi?

Rusiyanın Soçi şəhərində keçirilən "KVN-2022" festivalında Bakının "Şuşa" KVN klubunun adı müzakirələrə səbəb olub.

Publika.az xəbər verir ki, komandamız ikinci tura yüksəldikdən sonra festivalın rəsmi saytında adının dəyişdiyi məlum olub.

Belə ki, "Şuşa" adı "Buta" ilə əvəzlənib. Məşhur idman şərhçisi Sənan Şəfizadə feysbukda bununla bağlı fikirlərini bölüşüb.

"Soçidə KVN yarışmasında iştirak edən "Şuşa" adlı komandamızı adını dəyişdirməyə məcbur ediblər. Adını dəyişərək olub "Buta". Birincisi, bu adı qoruya bilməyəcəksinizsə, istifadə etməyin. İkincisi, düşünmək lazımdır - uzağı yarışdan çıxarılacaqdınız. Buna görə "Şuşa"nı "Buta"ya dəyişməyə dəyərdi? İndi lap çempion olsanız belə, bu qələbə heç kimə lazım deyil. Mənə görə "Bakılı oğlanlar"dan sonra KVN mənasızdır. Adamlar bu işdə! yazıb", - S.Şəfizadə qeyd edib.

Müğənni və aparıcı Murad Arif isə "Şuşa" adını dəyişdirmək tələbini irəli sürənlərin müəyyən məsuliyyətə cəlb edilməsini təklif edib və bildirib ki, komandamızı o turnirdən geri çağırmalıyıq.

Qeyd edək ki, komandanın rəhbəri məşhur ssenarist və prodüser Müşfiq Abbasovdur.