İradə İsak: “Kanal rəhbərləri sevmədikləri bu simalara möhtacdırlar”

Deyirsiniz, efirdən qovulsun! Nətər? O kanallar, onların təşəxxüslə gəzən rəhbərlərinin efir siyasəti bu aparıcıların üzərində dayanır, onların reytinqinə, reytinqdən gələn qazanca, bəzən, hətta özləri də sevmədikləri bu simalara möhtacdırlar. O aparıcılara İlahi varlıq kimi hörmətlə yanaşırlar.

Publika.az xəbər verir ki, bu sözləri eks-aparıcı, İRİS Televiziya və Jurnalistika Məktəbinin rəhbəri, telejurnalist İradə İsak Zaur Kamalın cənubi azərbaycanlı müğənni Afşin Azərini canlı efirdən uzaqlaşdırması barədə danışarkən deyib. Televiziyalardakı mövcud problemlərə toxunan eks-aparıcı iradlarını dilə gətirib:

“Aparıcının gözəl nitqi olmalıdır, xoş siması, intellekti olmalıdır” - dediklərinizin biri də reytinq vermir. Çünki TV bazamız yoxdur, şou aparıcılar yetişdirilmir. Bu uşaqlar isə özləri-özlərini yaradıb, indi də kanala haqlı olaraq diqtə edir. “Mənim verilişim” deyir, “mənim efirimdən çıx” deyir. Çünki həqiqətən elədir.

Zamanında bir çox TV-lərin qapısını döydüm. Dedim, gəlin, 70-ci illərin diktorlarının dilində yox, müasir TV standartlarına cavab verən xəbər, proqram aparıcıları yetişdirək. Hamısı özündən razı halda “ehtiyacımız yoxdur” dedilər. Amma hansısa aparıcının yaxa mikrofonundan sallaşa qalmağa ehtiyacları var, hətta möhtacdırlar. Özlərinin yaratdığı isə boş, sönük ulduzlardır və onları sizə yedirməzlər. Havayı ümid etməyin. Çünki başqa əlacları yoxdur”.