Hikmət Rəhimovdan şok iddia: "O pulu basıb yedilər"

Dünyanın bir çox festivallarında qalib olan "Çılpaq" filminin rejissoru və tanınmış aktyor Hikmət Rəhimov serialllara ayrılan büdcənin mənimsənilməsindən gileylənib.

Publika.az xəbər verir ki, İctimai TV-nin "Dikdaban" proqramında qonaq olan aktyor bu barədə şok iddialar ortaya atıb.

"Bir neçə il əvvəl ölkə başçısı serial sektoruna büdcə ayırdı. Heç nə, pulu basıb yedilər, serial da ortaya çıxmadı. Görürlər ki, iş də getmir... Onda o büdcəni niyə ayırmalıdırlar ki?", - aktyor qeyd edib.

Kino ulduzu illər əvvəl Prezident İlham Əliyev tərəfindən serialların inkişafına dəstək məqsədilə ayrılan 6 milyon manat vəsaitin mənimsənilməsinə də toxunub:

“Görürlər ki, iş də getmir... Onda o büdcəni niyə ayırmalıdırlar ki? 6 milyon büdcə ayrılmışdı ki, serialların inkişafına hissə-hissə bölünsün. O pul nə bölündü, nə bir şey olundu, kiminsə əlinə düşdü. Birini dəqiq bilirəm, adını çəkmirəm. 6 milyon Azərbaycanın serial sektoru üçün pis pul deyildi. Bunu da ayırdılar ki, bir az özünüzə gəlin, dirçəlin. Kimsə də pulu götürüb qoydu cibinə ki, tək mən dirçəlim. Ona görə düzəlmədi”.

Qeyd edək ki, sözügedən Sərəncam 2013-cü ilin aprelində imzalanıb.