Rusiya strateji bombardman təyyarələrini yeniləyir - Dünyada ilk

Rusiya Tu-160M və Tu-160M2 strateji bombardman təyyarələrinin mənzilini artırır.

Publika.az xəbər verir ki, bu barədə Rusiya Müdafiə nazirinin müşaviri Aleksey Krivoruçko danışıb.

O bildirib ki, təyyarələrin uçuş mənzili NK-32 motorları sayəsində 1000 kilometr artacaq. Bununla da onların mənzili 13 min 300 km olacaq.

Qeyd edək ki, Tu-160 strateji bombardman təyyarəsinin ilk prototipi Tupolev Aviasiya Şirkəti tərəfindən həyata keçirilən strateji və uzunmənzilli döyüş təyyarələrinin təkmilləşdirilməsi üçün yaradılan böyük ölçülü proqramın parçası olaraq istehsal edilib.

Tu-160 dünya aviasiya tarixində istehsal edilmiş ən böyük və güclü hipersəs təyyarəsi kimi tanınır. Eyni zamanda, qanadlarının geometriyası dəyişə bilən ən ağır (110 000 kq) döyüş təyyarəsidir. İlk dəfə 1987-ci ildə SSRİ ordusunun xidmətinə verilən hava gəmisi Rusiya Aviasiya-Kosmos Qüvvələrinin Suriyadakı əməliyyatlarında istifadə olunur.

2015-ci ildə strateji bombardmançının Kazan Təyyarə Fabrikində istehsalına yenidən başlanacağı elan edildi. Ötən ilin noyabr ayında isə test poliqonuna təhvil verildi.

Təkmilləşdirilmə işlərindən sonra T-160-ın potensialının 60% civarında artması gözlənilir.

Zümrüd