Putinin Trampın elçiləri ilə görüşü bitdi - YENİLƏNDİ

Rusiya Prezidenti Vladimir Putinin ABŞ prezidentinin xüsusi nümayəndəsi Stiv Uitkoff ilə görüşü yekunlaşıb.

Publika.az xəbər verir ki, görüş beş saatdan çox davam edib.

Məlumata görə, danışıqlardan sonra Uitkoff Kremli tərk edərək ABŞ səfirliyinə gedib.

Putinin xarici ölkələrlə investisiya və iqtisadi əməkdaşlıq üzrə xüsusi nümayəndəsi Kirill Dmitriyev "X" hesabında görüşün məhsuldar keçdiyini yazıb.

Görüşdə Rusiya tərəfdən Putinin köməkçisi Yuri Uşakov və xarici ölkələrlə investisiya və iqtisadi əməkdaşlıq üzrə xüsusi nümayəndəsi, Rusiya Birbaşa İnvestisiya Fondunun baş direktoru Kirill Dmitriyev, Amerika tərəfdən isə sahibkar, investor, "Affinity Partners" şirkətinin təsisçisi Jared Kuşner iştirak edib.

xxx

21:12 - 02.12.25

Rusiya Prezidenti Vladimir Putin ABŞ Prezidenti xüsusi elçisi Stiv Uitkoff və amerikalı liderin kürəkəni Cared Kuşner ilə görüşə başlayıb.

Publika.az xəbər verir ki, bu barədə TASS məlumat yayıb.

Rusiya tərəfdən görüşdə prezidentin köməkçisi Yuri Uşakov və prezidentin xüsusi nümayəndəsi, Rusiya Birbaşa İnvestisiyalar Fondunun (RBFİ) rəhbəri Kirill Dmitriyev iştirak edir. Gözlənilir ki, görüşdə Ukraynaya dair “Trampın sülh planı” müzakirə olunacaq.

Görüşdən bir qədər əvvəl Rusiya Prezidentinin mətbuat katibi Dmitri Peskov bildirib ki, Moskva sülh yolu ilə tənzimləməni müzakirəyə açıqdır, lakin müəyyən edilmiş hərbi məqsədlərə çatmalıdır. Peskov jurnalistlərə görüşün detalları barədə məlumat verməkdən imtina edib və qeyd edib ki, “megafon diplomatiyası” bu halda faydasızdır. Öz növbəsində Kirill Dmitriyev 2 dekabr tarixini sülh üçün mühüm gün adlandırıb.

ABŞ və Ukrayna nümayəndə heyətləri arasında Floridada keçirilmiş danışıqlar 30 noyabrda baş tutub. “Strana.ua” nəşri yazır ki, tərəflər sülh planının əsas məqamlarında razılığa gələ bilməyiblər. Xüsusilə, ukraynalı nümayəndələr Donetsk Xalq Respublikasından qoşunları çıxarmağa razı olmayıb, bunu konstitusiya məhdudiyyətlərinə əsaslandırıblar.

Hüseyn İbadlı