Rusiya Ukrayna ilə danışıqlarda tonunu dəyişib: Səbəbi bəllidir

Rusiya nümayəndə heyəti Əbu-Dabidə Ukrayna və ABŞ ilə danışıqlar zamanı tonunu dəyişib, çünki Moskva Avropa İttifaqının militarizasiyasını əngəlləmək niyyətindədir.

Publika.az xəbər verir ki, bu barədə "Politico" nəşri Ukrayna prezident aparatı ilə məsləhətləşmələri davam etdirdiyi adı açıqlanmayan keçmiş Ukrayna rəsmisinə istinadən məlumat yayıb.

Onun sözlərinə görə, münaqişə bitərsə, Avropa liderləri üçün seçicilərinə müdafiə xərclərinin artırılmasının zəruriliyini izah etmək xeyli çətin olacaq və Moskva danışıqlar qrupunun yanaşmasını dəyişdirməklə məhz buna ümid edir.

"Sülh sazişi, müharibənin sonu bu impulsu xeyli zəiflədə bilər - Avropa liderləri üçün seçicilərini daha yüksək müdafiə xərclərinə keçmək üçün lazımi qurbanları verməyə inandırmaq daha çətin olacaq", - deyə o bildirib.

Nəşrin mənbəyi qeyd edib ki, Rusiya nümayəndə heyəti peşəkarcasına hərəkət edir və razılaşmanın praktiki detalları üzərində fəal şəkildə işləyir. Bundan əlavə, Ukrayna hakimiyyəti ilə işləmiş xarici siyasət üzrə anonim ABŞ respublikaçı eksperti jurnalistlərə bildirib ki, Əmirliklərdə danışıqlar daha konstruktiv xarakter alıb.

23 və 24 yanvar tarixlərində Birləşmiş Ərəb Əmirliklərinin (BƏƏ) paytaxtı Əbu-Dabidə Ukraynadakı münaqişənin həlli ilə bağlı üçtərəfli danışıqlar keçirilib. Rusiya, ABŞ və Ukraynanın nümayəndələri qapalı qapılar arxasında keçirilən görüşdə iştirak ediblər.

Danışıqların yeni mərhələsi bu gün, fevralın 4-də başlayacaq.

Tural