Rusiya Kallasa atasının keçmişini xatırlatdı: Tövsiyə etdi ki...

Rusiya Dövlət Dumasının sədri Vyaçeslav Volodin Avropa diplomatiyasının rəhbəri Kaya Kallasa atasının Estoniyada Sovet İttifaqı Kommunist Partiyasının (Sov.İKP) üzvü olduğunu xatırladıb.

Publika.az xəbər verir ki, Volodin bu barədə "Telegram" kanalında paylaşım edib.

Onun sözlərinə görə, Kallasın Rusiyanın "son 100 ildə 19 ölkəyə hücum etdiyi" iddiaları tarixi biliklərin çatışmazlığını nümayiş etdirir və Aİ-nin yüksək səviyyəli xarici siyasət rəsmisini nüfuzdan salır. Dövlət Dumasının spikeri Kallasın keçmişini nəzərə alaraq, onun tarixi faktları daha yaxşı başa düşməli olduğunu vurğulayıb.

Volodin şərhində qeyd edib ki, Kallas Sovet İttifaqı Kommunist Partiyası üzvünün və Estoniya SSR-in, eləcə də müstəqil Estoniyanın dövlət xadiminin qızıdır. O iddia edir ki, Avropa diplomatiyasının rəhbəri ya məktəbdə tarixi zəif öyrənib, ya da tamamilə görməzdən gəlib və bunu atasının o dövrdəki yüksək rəsmi vəzifəsi ilə əlaqələndirib.

Parlamentin aşağı palatasının spikeri həmçinin Kallasın keçmişdən uzaqlaşmağa və özünü Rusiyanın qatı əleyhdarı kimi göstərməyə çalışdığına inandığını bildirib. Volodin əlavə edib ki, bu cür açıqlamaların səbəbləri onun uşaqlığına gedib çıxa bilər və ona mütəxəssisə müraciət etməyi tövsiyə edib.

Tural