Putin cəmiyyəti yeni "qismən səfərbərliyə" hazırlayır: Amma həm də qorxur ki...

Rusiya Prezidenti Vladimir Putin itkilərlə üzləşən ordusunu formalaşdırmaq üçün ehtiyatda olan hərbçilərin məcburi qismən hərbi xidmətə çağırılmasının bərpası üçün "informasiya şəraiti" yaradır.

Publika.az xəbər verir ki, Amerika Müharibə Tədqiqatları İnstitutunun ekspertləri bu qənaətə gəliblər.

Onlar hesab edirlər ki, yeni "qismən səfərbərlik"ə hazırlıqlar ötən ilin sonlarında Müdafiə Nazirliyinin 2 milyon nəfərlik səfərbərlik ehtiyatı yerləşdirməsinə icazə verən qanunlarla, eləcə də müqaviləli əsgərlərin axınının artıq cəbhə itkilərini ödəməməsi ilə sübut olunur. Qərb kəşfiyyatının hesablamalarına görə, yanvar ayında orduya döyüş meydanında itirilən heyətdən 9000 az əsgər cəlb edilib.

ISW qeyd edir ki, hakimiyyət orqanları ehtiyatda olanların yalnız vacib obyektləri "mühafizə etmək" üçün göndəriləcəyini bəyan etsələr də, qanun onların Rusiyadan kənarda yerləşdirilməsinə icazə verir. Bundan əlavə, institutun ekspertləri qeyd edirlər ki, noyabr ayından bəri Rusiyadakı hərbi komissarlıqlar il boyu çağırış həyata keçirir və dekabr ayında Putin ehtiyatda olanların təlimi haqqında qanun imzalayıb.

ISW yazır ki, əvvəlki səfərbərlik mərhələsi - 2022-ci ilin sentyabrında - kəskin narazılıq dalğasına və 700.000-900.000 nəfərin xaricə qaçmasına səbəb olub. Mütəxəssislərin vurğuladığı kimi, Putin bunun təkrarlanmasından qorxur.

Baxmayaraq ki, müqaviləli əsgərlərin hazırkı sayı yalnız sabit ordu sayına imkan verir və institutun hesabatında deyilir ki, 2022-ci ildə səfərbər edilmiş 300.000 nəfərdən yalnız 78.000-i cəbhə xəttində qalır (keçən ilin may ayına olan məlumata görə).

ISW yazır ki, "Putin uzun müddətdir ki, tarazlıq tapmağa çalışır – daha bir genişmiqyaslı qismən hərbi çağırışla bağlı ictimai narazılığın qarşısını almaq, hücumun sürətini qorumaq və onsuz da gərgin olan Rusiya iqtisadiyyatının həm mülki, həm də müdafiə-sənaye sektorlarında işçi qüvvəsini qorumaq ehtiyacı var".

ISW yazır ki, "Kremlin Rusiya cəmiyyətini ehtiyatda olan əsgərlərin yeni qismən çağırışına hazırlamaq səyləri Putinin çətin bir seçimlə üzləşdiyini göstərir".

Təhlükəsizlik Şurasının sədr müavini Dmitri Medvedevin sözlərinə görə, Müdafiə Nazirliyinin işə qəbul kampaniyası nəticəsində 2025-ci ilin sonuna qədər orduya 422.700 yeni əsgər cəlb edilib. Bir il əvvəl bu rəqəm 450.000, 2023-cü ildə isə yarım milyon olub. Beləliklə, üç il ərzində orduya axın təxminən 10% azalıb.

Məlumata görə, Rusiya ordusunun ötən il cəbhə xəttində itkiləri 425.000 təşkil edib və müharibənin əvvəlindən bəri ümumi itkilər 1,2 milyon təşkil edir, o cümlədən 325.000 nəfər həlak olub. Bu, Sovet ordusunun Əfqanıstandakı itkilərindən 17 dəfə, hər iki Çeçenistan müharibəsi zamanı itkilərindən 11 dəfə çoxdur.

Tural