Ekspertdən dollarla bağlı yeni proqnoz - Məzənnə kəskin arta bilər

2026-cı ilin sonunda dolların məzənnəsinin 90 rubl (plus-minus 2-3 rubl) səviyyəsində olacağı gözlənilir.

Publika.az xəbər verir ki, bu barədə “Qarda Kapital” şirkətinin investisiya strateqi Aleksandr Baxtin Gazeta.ru-ya müsahibəsində bildirib.

Ekspert qeyd edib ki, bu, hazırda Rusiya maliyyə bazarında böyük banklar və brokerlərin konsensus proqnozudur:

“Məntiq sadədir: dekabr ayına qədər uçot dərəcəsinin 11–12%, rubl əmanətlərinin gəlirliliyinin isə 9–10% civarında olması gözlənilir. Eyni zamanda, Maliyyə Nazirliyi büdcə qaydası ilə tam işləyir və idxal ötən ilin səviyyəsinə bərpa olunur. Bütün bunlar dolların hazırkı 74 rubl səviyyəsindən yarım ildən az müddətdə 85–90 rubla qədər tədricən yüksəlməsinə səbəb olacaq”.

A. Baxtinə görə, neftin qiyməti yüksək qalarsa, dollar 85–88 rubla, əksinə, mənfi ssenari reallaşarsa və uçot dərəcəsi sürətlə aşağı düşərsə, məzənnə 95–100 rubla qədər arta bilər.

Strateq rublun zəifləməsinə təsir edən əsas amilləri aşağıdakı kimi sıralayıb:

• Uçot dərəcəsinin dəyişməsi: Uçot dərəcəsinin hər 1 faiz bəndi azalması rublun orta hesabla 2–3% zəifləməsinə gətirib çıxarır.
• İdxalın artımı: Kredit faizləri aşağı düşdükcə idxal həcmləri artacaq ki, bu da valyutaya olan tələbatı yüksəldir.
• Büdcə qaydası: Maliyyə Nazirliyinin büdcə qaydası çərçivəsində valyuta alışlarını artırması rubla təzyiq göstərir.

Ekspert sonda əlavə edib ki, neftin qiyməti və geosiyasi vəziyyət qısamüddətli dəyişkənliyə səbəb olsa da, rublun uzunmüddətli məzənnəsini məhz qeyd olunan üç amil müəyyən edir.

Hüseyn İbadlı